Sejarah Desa

Sadurung ngranjing ring Kota Kediri Tabanan, majanten jagi nglintangin desa sane mapesengan Desa  Abiantuwung. Taru bingin ageng sane wenten ring sisi kaler margi, nyihnayang sampun ngranjing ring Kabupaten Tabanan. Ring samping taru bingin punika, wenten Pura Desa sane taler wenten ring  sisin margi. Daweg warsa siyu sangang atus roras, Pura Desa puniki sampun wenten.

Desa Abiantuwung wantah pinaka desa  Bali Kuno. Akeh pisan tetamian arkeologi marupa Arca Ganapati utawi Ganesa utawi Binayaka ring Pura Puseh Abiantuwung. Yening nyantenang parindikan sekadi punika, nyihnayang yening samin saking riin daweg Bali Kuno, sampun wenten makudang-kudang parikrama agama sane kamargiang irika. Wewidangan Abiantuwung daweg riin wantah pinaka wewidangan sane dahat tenget,  saantukan daweg dumun desane puniki wantah pinaka alas gesing/ tiying. Wit wastan desa puniki nenten lempas saking Puri Buluh Knana sane kantun rajeg kantor mangkin. Daweg riin, lelangit ring Puri Buluh Knana, sugra sane maparab Kiyayi Anglurah Gde Jenggala. Ida kaicen genah ring panepi margga olih sang rumaksa jro margga, pamekas Kyayi Margga, genah punika marupa wana pering ring ancut margga. Wana pering boya tios wantah alas gesing, pateh pitegesipun sareng Buluh Kanana. Suwen kasuwen, magentos dados Abiantuwung,  sane mapiteges genah sane kapaicayang "tanah persembahan", mangda setata eling yening genahe inucap wantah tanah paica..

Tios ring punika taler, yening selehin ring kawentenan kekuub wewidangan Desa Abiantuwung, majanten dahat akeh pura sane ngiderin wewidangan desa irika. Desa puniki sekadi mapagehan antuk pura. 

Ring Desa Abiantuwung wenten mapesengan Desa Dakdakan. Wit wastan desa inucap wenten kaunggahang ring babad Kaba-Kaba. Duke sapanyenengan arya Dalem ring Kaba-Kaba, wenten raris Kyai Buringkit sane mamanah ngambil kaprabon Ida. Sangkaning punika panjak irika mepah dados kakalih nanging akehan sane melanin ida raja. Punika ngawinan yuda ageng. Payudan kapanggihin ring sisi kaler Kaba–Kaba. Ida sang prabu raris mamargi ngruruh Ida pandita sane magenah ring Gerya Bayuh. Ring sapamargan Ida, kapanggihin raris wadwa saking Kyai Buringkit, kauber antuk wadwan-wadwan sang prabu. Kyai Buringkit malaib ka sisi kaler, wadwan ipun akeh sane padem sangkaning  pangabih sang natha sane kabaos Ki Pasek lima. Wewidangan genah payudan puniki sane kabaos  Dekdekan sane ring galahe mangkin mauwah dados Dakdakan. Ngawit punika,  Kyai Buringkit tan malih kaangken sameton antuk dane Anglurah Kaba – Kaba.

Kirang langkung mangda ledang ngampurayang, saha prasida taler nguwah nguwuhin daging ipun.