 |
| Konservasi Lontar ring Br. Pacung Bebalang Tabanan |
Om Swastyastu. Titiang I Kadek Widiantana, S.Pd.B.,M.Pd. Penyuluh Bahasa Bali Dinas Pendidikan Provinsi Bali sané polih amongan ring Désa Abiantuwung, Kediri Tabanan, ring sasihé puniki sampun prasida nglaksanayang makudang-kudang pidabdab wiadin parikrama risajroning niténin, nglimbakang saha ngwêrdiang basa, aksara wiadin aksara Bali, minakadi malarapan antuk kelompok belajar, konservasi lontar, ngayah, keluarga binaan wiadin nyarengin parikrama-parikrama sane kamargiang ring kantor perbekelan. Pamargin pokjar kantun kaulêngang majeng sisya SD, antuk ngambil gênah ring SD N 5 Abiantuwung, kepah dados tigang kelompok belajar. Mapaikêtan ring pamargin konservasi wiadin idéntifikasi lontar, sampun kamargiang konservasi ring Br.Pacung, Bebalang Kediri Tabanan dawêg tanggal 5, 6 Maret warsa 2018. Nglantur raris ring tanggal 26, 27 Maret warsa 2018, konservasi wiadin idéntifikasi kalaksanayang ring Br.Puseh, Kediri Tabanan. Ring Banjar Puseh Kediri Tabanan, wénten dasaan cakep lontar pinaka tetamian Ida Rsi dumun sane sampun lebar dawêg riin. Lontar sane kapanggihin minakadi lontar Aji Saraswati, Tutur Dukuh Ring IWargasari, Kidung Bali Sancaya, Têgês Padma Ring Sarira, Tingkahing Aprayoga, Tutut Aji Jo Biru, Kramaning Mawintên, Amuja Ring Ring Sanggar, Payogan Bhagawan Wisma Karma, Sundari Bungkah, Arga Patra, Ptanganan, Pangêntas Matanêm, Aji Kunang-kunang, msl. Lontar inucap katami antuk Bapak Putu Sudiana. Agêng pangaptinê mangda têtamian inucap sida panjang tuwuh ipun, ngawibuhang kasusastraan Bali sané marupa lontar. Sios ring punika, Keluarga Binaan taler sampun sida mamargi, saha kaselehin yéning pikêdêh krama risajroning malajah basa Bali dahat kirang. Ring baos sayuwakti kabaosang basa Bali kawéntênané mabuat, nanging lémpas saking laksana. Napi malih akéh panampén krama "depang ne cerik-cerik sêlêg malajah, iraga pun tua, pun terlambat". Yéning cutêtang, yayah rêna ipun bangêt ngaptiyang mangda pianaknyané sida wikan mabasa Bali, wikan nyurat aksara Bali. Majantên kantun akéh sane patut kapidabdabin, patut kawilangin malih risajroning ngrajegang basa Bali druwé. Maka wêsananing atur, puputang titiang antuk parama shanti,
Om Santih, Santih, Santih Om.
 |
| Konservasi Lontar ring Br. Puseh Kediri Tabanan |
 |
Pokjar ring SD N 5 Abiantuwung
|
Komentar
Posting Komentar